МЭДЭЭ МЭДЭЭЛЭЛ

  1. НҮҮР
  2. МЭДЭЭ МЭДЭЭЛЭЛ

Apple компани энэ хаврын шинэ бүтээгдэхүүнүүдээ зарлалаа

: 2021-04-23

Өчигдөр Apple компани “Spring Loaded” нэртэй энэ хаврын шинэ бүтээгдэхүүн танилцуулах арга хэмжээгээ зохион байгууллаа. Энэ удаа тус компани шинэ iPad Pro, шинэ iMac, шинэ өнгөтэй iPhone 12, AirTag, шинэ Apple TV 4K зэрэг бүтээгдэхүүнүүдээ үзүүлсэн юм. M1 чиптэй шинэ iPad Pro Өнгөрсөн оноос Apple компани өөрийн зохион бүтээсэн M1 чипээр бүтээгдэхүүнүүдээ тоноглож эхэлсэн билээ. Тэгвэл энэ удаа MacBook Air, MacBook Pro, Mac mini компьютеруудын араас iPad Pro бүтээгдэхүүн нь M1 чиптэй болж байна. Өчигдөр M1 чиптэй 11 ба 12.9 инчийн хоёр iPad Pro танилцуулсан юм. Эдгээрээс 12.9 инчийн загвар нь 10,000 Mini LED гэрэлтүүлэгч ашигласан Liquid Retina XDR хэмээх шинэ технологийн дэлгэцтэй болжээ. Хоёр загвар хоёул 12 мегапикселийн хэт өргөн өнцгийн камертай болсон нь видео дуудлага хийх үед хүний хөдөлгөөнийг дагадаг технологи агуулсан юм байна. Дөрөвдүгээр сарын 30-нд урьдчилан захиалга авч эхлэх шинэ iPad Pro загварууд тавдугаар сарын сүүлийн хагаст худалдаанд гарах гэнэ. 11 инч загвар нь $799, 12.9 инч загвар нь $1,099 үнэтэй гарах ажээ. M1 чиптэй, цоо шинэ дизайн бүхий iMac Өчигдөр Apple компани гадна дизайныг нь бүрэн өөрчилсөн iMac дэсктоп компьютераа танилцууллаа. Маш нимгэн хийцтэй, 24 инчийн хэмжээтэй уг загвар нь бас M1 чипээр тоноглогджээ. Шинэ загвар нь 1080p-ийн FaceTime камертай, долоон өнгөний сонголттой, Touch ID хурууны хээ уншигчтай худалдаанд гарахаар болсон байна. $1,299 үнэтэй энгийн хувилбар нь дөрвөн өнгөний сонголттой байх бол $1,499 үнэтэй өндөр үзүүлэлттэй хувилбар нь долоон өнгөний сонголттой байх ажээ. Урьдчилсан захиалга нь дөрөвдүгээр сарын 30-нд эхэлж, тавдугаар сарын сүүлийн хагаст худалдаанд гарах юм байна. Эд зүйлсээ олоход туслах AirTag Эд зүйлсээ Find My апп ашиглан хайж олоход тус болох бяцхан төхөөрөмж АirTag-ийг өчигдөр Apple компани танилцууллаа. Хэрэглэгч AirTag бүртээ тусгайлан эможи оноож болох юм байна. Баасан гарагт $29-ийн үнээр урьдчилсан захиалга нь эхэлж, дөрөвдүгээр сарын 30-нд худалдаанд гарахаар болжээ. AirTag-ийг дөрвөөр нь багцалж авбал $99 үнэтэй болох гэнэ. A12 Bionic чиптэй Apple TV 4K Apple компани өчигдөр шинэ Apple TV 4K боксоо A12 Bionic чиптэй танилцуулсан байна. iPhone XS, XS Max, XR гар утаснууд A12 Bionic чиптэй байдаг. Ингэснээр HDR болон өндөр давтамжтай видео дүрсийг үзэх боломж нээгджээ. 32GB багтаамжтай хамгийн бага хувилбар нь $179-ийн үнэтэй худалдаанд гарах гэнэ. Урьдчилсан захиалга нь дөрөвдүгээр сарын 30-нд эхэлж, тавдугаар сарын сүүлийн хагаст худалдаалагдаж эхлэх юм байна. Шинэ Apple TV нь хөнгөн цагаан материал, хурууны даралт мэдрэгч пад, Siri товчтой шинэ удирдлагатай болжээ. iPhone 12 удахгүй хөх ягаан өнгөтэй гарна Өнгөрсөн онд зах зээлд гаргасан iPhone 12, iPhone 12 mini загваруудаа Apple энэ удаа хөх ягаан өнгөтэй болгохоор шийджээ. Шинэ өнгөтэй iPhone-уудыг Баасан гарагаас урьдчилан захиалж, дөрөвдүгээр сарын 30-наас худалдан авч болох юм байна. “Spring Loaded” арга хэмжээг 11 минутад багтаан товчилсон бичлэгийг толилуулж байна:

Шинэ мэдээ